Këtë fundjavë, në Shkollën e Mesme Teknike “Nexhmedin Nixha” në Gjakovë, janë zhvilluar dy ditët e para të programit të trajnimit “Ngritja e Kapaciteteve të Anëtarëve të Këshillave të Nxënësve”, në kuadër të projektit “Iniciativa për Zhvillimin e Liderëve të Rinj të Ballkanit Perëndimor”.
Programi synon të fuqizojë anëtarët e këshillave të nxënësve dhe t’i mbështesë ata në zhvillimin e njohurive dhe shkathtësive që u nevojiten për të qenë pjesëmarrës aktivë, të informuar dhe të përgjegjshëm në proceset demokratike brenda shkollave dhe komuniteteve të tyre.
Gjatë trajnimit, nxënësit patën mundësi të mësojnë më shumë rreth të drejtave të njeriut dhe demokracisë, si dhe të zhvillojnë shkathtësi praktike në pjesëmarrje, avokim dhe inicimin e veprimeve konkrete. Përmes diskutimeve, aktiviteteve praktike dhe punës në grup, dy ditët e para krijuan një hapësirë për shkëmbim të ideve, bashkëpunim dhe zhvillim të aftësive të nxënësve për të luajtur një rol më aktiv në shkollat dhe komunitetet e tyre.
Trajnimet do të vazhdojnë edhe në shkollat tjera përfituese të projektit.
_____________________
Projekti BELI zbatohet nga Qendra për Arsim e Kosovës (KEC), në partneritet me organizata nga Serbia, Bosnja dhe Hercegovina dhe Maqedonia e Veriut, në kuadër të programit Erasmus+ “Ndërtimi i Kapaciteteve në fushën e Rinisë”.
