Projekti për Përmirësimin e Pjesëmarrjes në Arsim
 

Personi kontaktues: Dukagjin Pupovci

■ Sistemi i arsimit në Kosovë

Në sistemin arsimor të Kosovës janë bërë ndryshime të dukshme gjatë viteve të pasluftës. UNMIK-u dhe MASHT, me përkrahjen e shumë donatorëve, kanë themeluar një sistem të decentralizuar të administratës dhe qeverisjes financiare. Ky është një transferim i përgjegjësive nga niveli qendror në atë lokal (komunal dhe shkollor).

Komunat/shkollat janë vetë përgjegjës për planifikimin dhe shfrytëzimin e të mirave materiale dhe buxhetit, si dhe për zhvillimin e një pjese të plan-programit në bazë shkolle. Sistemi i arsimit në Kosovë ka arritur të tejkalojë shumë vështirësi, por ende mbetet mjaft për t'u bërë në mënyrë që të arrijë nivelin e sistemeve të përparuara evropiane.
 

■ Donatori i projektit

Banka Botërore financon këtë Projekt i cili ka për qëllim:

►ofrimin e mundësive të barabarta për të gjithë në kuptimin e qasjes, vazhdimit dhe përfundimit të shkollimit fillor dhe të mesëm
►ngritjen e cilësisë së planifikimit arsimor në shkolla
►ngritjen e efikasitetit të shkollave, përmirësimin e kushteve në shkollë dhe ngritjen e cilësisë së mësimdhënies
 

■ Projekti për Përmirësimin e Pjesëmarrjes në Arsim (PPPA)

Objektivi kryesor i këtij projekti është të përmirësojë arritjet arsimore në nivelet e arsimit fillor dhe të mesëm dhe të shtojë mundësitë për përfshirjen në arsim të grupeve të pafavorizuara në Kosovë.

Kriteret për përzgjedhjen e shkollave:
►varfëria
►mospërfshirja (e pakicave kombëtare, vajzave...)
►vijueshmëria/ mbajtja e nxënësve në shkollë
►braktisja

Indikatorët kryesorë:
►profili i regjistrimit (totali, vajzat, djemtë, pakicat kombëtare...)
►mbajtja e nxënësve në shkollë
►shkalla e braktisjes
►barazia gjinore
►përqindja e nxënësve që jetojnë nga ndihmat sociale


■ Cila mund të jetë vlera maksimale financiare e një projekti?

Shkollat fillore mund të hartojnë një projekt me buxhet deri më 10,000 €, ndërsa shkollat e mesme deri më 15,000 €.


■ Përgatitja e Projekt-Propozimit

Për shkollat të cilat dëshirojnë të marrin pjesë në projekt do të sigurohet aftësimi dhe ndihma profesionale në hartimin e planeve zhvillimore dhe projekteve shkollore. Po ashtu, informata më të hollësishme për procedurën e aplikimit mund të merren nga Doracakët për grante shkollore që do t'u shpërndahen komunave dhe shkollave.
Çdo shkollë e përzgjedhur për pjesëmarrje në projekt, duhet të formojë Këshillin e Shkollës ose Grupin Punues për hartimin e planit zhvillimor të shkollës në bazë të së cilit hartohet projekt propozimi. Plani zhvillimor i shkollës duhet të përmbajë prioritetet e shkollës për periudhën 3-vjeçare, të cilat prioritete ndihmojnë edhe komunitetin përkatës përgjithësisht. Pas kësaj hartohet projekt propozimi me të cilin aplikohet për grant.


■ Institucionet dhe nivelet përgjegjëse për grantet shkollore

►Këshilli për Miratimin e Granteve Hhkollore ( KAGSh)
►Njësia për Menaxhimin e Projektit (NJMP)
►Ekipi Komunal për Grante Shkollore ( EKGSh)
►Këshilli i shkollës
►Drejtori i shkollës


■ Kush vendos për financimin e granteve shkollore?

Projekt-propozimi kalon në disa faza. Pas hartimit të planit zhvillimor të shkollës dhe projektit shkollor, Ekipi Komunal për Grante Hhkollore (EKGSh) do të rishikojë projektet dhe do t'ia dorëzojë Këshillit për Aprovimin e Granteve Shkollore (KAGSh) i cili funksionon pranë MASHT dhe merr vendimin përfundimtar.


■ Kush e zbaton projektin?

Shkolla, udhëhequr nga drejtori i shkollës, nën mbikëqyrjen e Këshillit të Shkollës, Ekipit Komunal për Grante Shkollore (EKGSh) dhe personelit të Qendrës për Arsim të Kosovë (KEC). Të gjitha procedurat e blerjes së mallrave dhe shërbimeve bëhen në përputhje me rregullat dhe procedurat e prokurimit të Bankës Botërore.


■ Roli i Qendrës për Arsim të Kosovës (KEC)

Në këtë Projekt, roli i KEC është të ofrojë ndihmë teknike, përfshirë organizimin e trajnimeve dhe ndihmën në hartimin e projekteve. Ky qëllim do të realizohet përmes trajnuesve të KEC dhe bashkëpunëtorëve profesionalë të terrenit (të punësuar në KEC), të cilët mund të kontaktohen në zyrat regjionale që gjenden në:
Prishtinë, Gjilan, Ferizaj, Prizren, Gjakovë, Pejë, Mitrovicë.

 

■ Të arriturat e deritanishme

Në projektin për Përmirësimin e Pjesëmarrjes në Arsim  janë përfshirë më shumë se 500 shkolla fillore nga 32 komunat e Kosovës. Realizmi i projekteve është bërë nëpër cikle. Tani ka përfunduar implementimi i më shumë se 200 projekteve shkollore të përfshira në raundin e parë dhe të dytë, janë në zbatim e sipër 100 projektet shkollore nga raundi i tretë  dhe pritet që së shpejti të bëhet edhe aprovimi i 100 projekteve të raundit të katër. Shkollat e përfshira në raundin e pestë janë në fazën e planifikimit të projekteve shkollore. Në fillimi të muajit shkurt  këto shkolla do të dorëzojnë projektet shkollore për aprovim në Këshillin për Aprovimin e Granteve Shkollore dhe implementimi i tyre pritet të fillojë në tremujorin e parë të vitit 2006.

Qendra për Arsim e Kosovës,  për këto shkolla organizon trajnime në fushën e planifikimit, financave dhe prokurimit me qëllim të aftësimit të Këshillave të shkollës për hartimin dhe realizmin e projekteve shkollore. Vlen të përmendet se realizmi i këtyre projekteve shkollore ka fuqizuar rolin e Këshillave të shkollës , pasi që ky organ është hartues, mbikëqyrës dhe zbatues primar i projektit shkollor. Njëkohësisht, këto projekte shkollore kanë qenë një shans i krijuar për menaxhmentin e shkollës që të bëjë prokurimin dhe financat, gjë të cilën ata nuk e bëjnë gjatë realizmit të punës së tyre ditore.

Projektit për Përmirësimin e Pjesëmarrjes në Arsim pritet  të përfundojë në qershor 2006.