Personi kontaktues: Halim Hyseni

Qëllimi i këtij projekti është avancimi i të drejtave të fëmijës në arsimin e detyruar të Kosovës, duke ndërtuar kapacitete lokale dhe duke siguruar në vazhdimësi përmirësimin dhe fuqizimin e të drejtave të fëmijës.
 

■ Objektivat

►Përpilimi i programit për trajnimin e 50 trajnerëve për të drejtat e njeriut dhe të fëmijës;

►Aftësimi i rreth 50 trajnerëve vendorë për të drejtat e njeriut dhe të fëmijës;

►Përgatitja e programit për aftësimin e 1550 këshilltarëve për të drejtat e njeriut dhe të fëmijës në arsimin fillor dhe të ulët të mesëm;

►Aftësimi i 1550 mësimdhënësve këshilltarë për të drejtat e njeriut/fëmijës;

►Themelimi i rreth 600 komiteteve shkollore për të drejtat e njeriut/fëmijës në të gjitha shkollat fillore dhe të ulëta të mesme të Kosovës;

►Ofrimi i ndihmës Fakultetit të Edukimit për përpilimin e kurrikulit për arsimimin dhe aftësimin e studentëve për të drejtat e njeriut dhe të fëmijës;

►Rritja e shkallës së sensibilizimit të opinionit për të drejtat e njeriut dhe të fëmijës nëpërmjet bashkëpunimit me media, tryezave të rrumbullakëta, publikimeve dhe konferencave;

►Ofrimi i ndihmës në përpilimin e strategjisë nacionale për mbrojtjen e të drejtave të fëmijës;

►Edukimi për demokraci, paqe dhe tolerancë, në përputhje me angazhimet dhe vlerat e promovuara nga Organizata e Kombeve të Bashkuara.
 

Implementimi i projektit ka filluar më 1 nëntor 2003 dhe financohet nga organizata TROCAIRE në Irlandë. Nga ajo periudhë, fillimisht është hartuar programi i trajnimit të trajnerëve; është organizuar një punëtori dyditore në temën Programi për trajnimin e trajnerëve; janë bërë disa prezantime të projektit para OJQ-ve, zyrtarëve rajonalë dhe të drejtorëve të drejtorive komunale të arsimit; është nënshkruar marrëveshja me Ministrinë e Arsimit, Shkencës dhe Teknologjisë së Kosovës; janë përzgjedhur 56 trajnerë potencialë: punëtorë arsimi, mjekë e juristë, të cilët i kanë vijuar me shumë sukses dhe interesim dy seminare gjashtëditore.

Me qëllim të përzgjedhjes së trajnerëve, janë hartuar edhe kriteret e certifikimit. Është vendosur kontakti me dekanin e Fakultetit të Edukimit për të bashkërenditur aktivitetet rreth përgatitjes së kurrikulit për të drejtat e fëmijës.
 

Në procesin e punës janë duke lindur ide të reja të cilat po na mundësojnë që të shpresojmë dhe gjithnjë e më shumë të besojmë se në të ardhmen do të ndodhin ndryshime shumë pozitive, të vëzhgueshme dhe të matshme në fuqizimin e të drejtave të njeriut dhe të fëmijës. Këtë besim e bazojmë në trajnimet e deritashme me pjesëmarrësit e përzgjedhur – kandidatë potencialë për trajnerë, të cilët me shumë entuziazëm janë duke punuar që të fitojnë sa më shumë kompetenca profesionale nga pedagogjia e të drejtave të njeriut dhe të fëmijës. Si pjesëmarrësit, ashtu edhe trajnerët, por edhe ne menaxhuesit e projektit jemi të bindur dhe plotësisht të vetëdijshëm se Kosova është në një garë ndërmjet respektimit të të drejtave të njeriut dhe fëmijës dhe të katastrofës. Ky mendim edhe pse duket pak sa  i tepruar, absolutisht është i vërtetë, sepse e ardhmja e Kosovës plotësisht është e lidhur me shkallën e respektimit të të drejtave të njeriut dhe të fëmijës dhe shkallën e edukimit e të arsimimit të qytetarëve të Kosovës, pavarësisht nga përkatësia etnike, racore, konfesionale, gjinore, ekonomike etj.

Për ketë arsye jemi duke punuar që procesi i edukimit dhe i arsimimit për të drejtat e njeriut dhe të fëmijës të bazohet në themelet e pedagogjisë konstruktiviste si rrugë më të drejtë të zhvillimit të secilit qytetar deri te kufijtë e skajshëm të mundshëm, dhe të pajisur me vlera humane, siç janë toleranca, mirëkuptimi, ndjenja për barazi, drejtësi, respekt për shtetin ligjor, për liri të lëvizjes dhe të qarkullimit, për solidaritet dhe mirëkuptim, për qëndrim të drejtë ndaj pakicave dhe kulturave të tjera, ndaj mjedisit, shëndetit, diversitetit kulturor, mirëqenies sociale të të gjithë qytetarëve, të parimeve të demokracisë, etj.

►Është hartuar programi i trajnimit trembëdhjetëditor për trajnimin e trajnerëve.
►Janë mbajtur 13 punëtori me qëllim të aftësimit të trajnerëve për të drejtat e njeriut/fëmijës.
►Janë certifikuar 49 trajnerë për të drejtat e njeriut dhe të fëmijës, nga të cilët 46 janë me përkatësi etnike shqiptare, një është me përkatësi etnike boshnjake, 2 janë me përkatësi etnike turke (nga aspekti profesional, tre janë juristë me fakultet të kryer juridik, një nga ta është me magjistraturë; dy mjekë; 44 janë mësimdhënës, prej të cilëve tre janë mësimdhënës universitarë).
►Janë identifikuar 1200 mësimdhënës të arsimit fillor nga të gjitha shkollat e Kosovës, të cilit janë përfshirë në trajnime pesëditore.
►Deri në muajin prill 2006, për këshilltarë për të drejtat e fëmijës janë certifikuar 1228 mësimdhënës.
►Aftësimi është bërë në përputhje me programin paraprak pesëditor, të hartuar nga stafi udhëheqës i KEC-it.
►Me qëllim të sensibilizimit të opinionit publik janë mbajtur 18 tryeza, debate televizive, dhe tribuna të ndryshme.
►Është hartuar Manuali për të Drejtat e Fëmijës. Manuali është botuar në gjuhën shqipe, turke dhe serbe- boshnjake.
►Në bashkëpunim e me UNICE-in , ILO-an, IPEC-un për trajnerët e certifikuar për të drejtat e njeriut/fëmijës gjatë vitit 2005 është mbajtur punëtoria katërditore në temat: Të mbështesim të drejtat e fëmijës përmes edukimit, artit dhe medias SCRIM dhe Parandalimi i punëve të rrezikshme të fëmijëve.
►Në partneritet me UNICEF-in, ILO-n, IPEC-un janë mbajtur trajnime njëditore për 50 grupe (601 pjesëmarrës) të mësimdhënësve këshilltarë për të drejtat e fëmijës. Këto trajnime janë mbajtur për një periudhë prej 30 ditësh, me temat: Parandalimi i punëve të rrezikshme që kryhen nga fëmijët dhe Të mbështesim të drejtat e fëmijës përmes edukimit, artit dhe medias.
►Në proces të aftësimit për këshilltarë për të drejtat e fëmijës janë edhe 50 grupe me mbi 1200 mësimdhënës, të cilit në seminaret gjashtëditore do të aftësohen për këshilltarë për mbrojtjen e të drejtave të fëmijës, për parandalimin e punës së rrezikshme për fëmijët, dhe për mbështetje të të drejtave të fëmijës përmes edukimit, artit dhe medias.
►Janë hartuar dokumente të rëndësishme për këshilltarë për mbrojtjen e të drejtave të fëmijës: udhëzime për formimin e Komiteteve shkollore për mbrojtjen e të drejtave të fëmijës, si dhe programi për aftësimin e trajnerëve dhe të këshilltarëve për të drejtat e fëmijës (këto dokumente janë shkruar në gjuhën shqipe, serbe-boshnjake dhe turke).
►Janë formuar mbi 500 Komitete shkollore për mbrojtjen e të drejtave të fëmijës.
►Është hartuar kurrikuli për lëndën ”Të drejtat e fëmijës dhe etika e mësimdhënësit”.
►Është organizuar një vlerësim i shpejtë në temën: Dhuna familjare mbi fëmijët e shkollës fillore.
►Gjatë vitit 2004 për 11 muaj është monitoruar shtypi ditor. Monitorimi ka pas të bëjë me trajtimin e të drejtave të njeriut dhe të fëmijës në shtypin ditor.
►Gjatë vitit 2005 dhe në vitin 2006 janë bërë / po bëhen përgatitjet për hartimin e strategjisë nacionale për të drejtat e fëmijës. Lidhur me këtë janë hartuar këto dokumente: Drafti për hartimin e strategjisë (i shkruar në gjuhën shqipe, serbe-boshnjake, turke, dhe angleze); Pse duhet hartuar strategjia nacionale e fëmijëve?, dhe disa projekte kërkimore për vlerësim të shpejtë të gjendjes së të drejtave të fëmijës.
►Është përmirësuar gjendja e të drejtave të fëmijës në arsimin fillor dhe të mesëm të ulët të Kosovës (liria më e madhe e shprehjes; dhuna dukshëm më e vogël fizike mbi fëmijë; atraktiviteti më i madh i mësimdhënies; është rritur shkalla e vendimmarrjes së fëmijëve në institucione arsimore; është shtuar dukshëm shkalla e njohjes së të drejtave të fëmijës nga vetë fëmijët, etj).

Me një qasje të këtillë sistematike, kemi arritur jo vetëm të realizojmë pjesën dërrmuese të objektivave por edhe mbi 80% të projektit. Kësisoj, deri në përfundimin e projektit do të krijohet një bazë solide për promovimin e të drejtave të fëmijës përmes edukimit.
 

■ Synimi

Synimi ynë me këtë projekt është që Kosova të jetë shembull për mbrojtjen e të drejtave të fëmijës për rajonin e Ballkanit. Kuptohet, këtë nuk e bëjmë me qëllim gare, por me qëllim të krijimit të një shoqërie miqësore për fëmijët e Kosovës, në mënyrë që të gjithë fëmijët e Kosovës, pavarësisht nga prejardhja e tyre etnike, fetare, gjinore, sociale e çfarëdo prejardhjeje tjetër, të jenë dhe të rriten të lumtur, me përkujdesje e dashuri, si dhe të zhvillohen deri te kufijtë e skajshëm të tyre fizik, emocional, social dhe intelektual.

Për më shumë inormacione në lidhje me Projektin për Të Drejtave të Fëmijës, klikoni www.childrights-ks.org