■ Gjenerata V e MKLSh-së (2004/05)

►Trajnimi i 490 mësimdhënësve në bashkëpunim me MASHT
►Trajnimi i 46 mësimdhënësve dhe zyrtarëve arsimorë në bashkëpunim me zyrat e DKA-ve në Prishtinë dhe Istog
►Trajnimi i 112 mësimdhënësve me participim në Gjakovë dhe Prishtinë
►Trajnimi i 31 mësimdhënësve në baza vullnetare në gjimnazin “S. Frashëri” në Prishtinë
►Trajnimi i 351 mësimdhënësve në bashkëpunim me Kultur Kontaktin nga Austria, UNICEF-in dhe OJQ-në Vizioni i Ri në Gjakovë.
►Certifikimi i 40 mësimdhënësve nga 5 Bordet Lokale të Programit të MKLSh-së
►Organizimi i trajnimit për trajnerë dhe certifikimi i 23 trajnerëve
►Organizimi i trajnimeve të shkurta lëndore në kuadër të Projektit TEMPUS për 200 mësimdhënës të matematikës dhe biologjisë në bashkëpunim me Universitetin e Prishtinës

 

KEC në bashkëpunim me MASHT-in ka organizuar trajnimin në kuadër të MKLSh-së për 490 mësimdhënës, të cilët kanë qenë të organizuar në 15 grupe në qendrat: Prishtinë (3 grupe), Klinë, Pejë, Gjakovë, Rahovec, Prizren, Suharekë, Lipjan, Gjilan, Ferizaj, Vushtrri, Mitrovicë dhe Podujevë. Organizimi i trajnimeve në bashkëpunim me MASHT-in ka rëndësi të veçantë, sepse tregon se MASHT e vlerëson programin e MKLSh-së si një program cilësor për zhvillimin profesional të mësimdhënësve në të cilin duhet të investohet.

Përparësitë e zbatimit të Programit të MKLSh-së në procesin mësimor si: aktivizimi i nxënësve, zgjidhja e problemeve të ndryshme në mënyrë kreative si rezultat i punës në grupe, diskutimet konstruktive në analizimin e situatave të ndryshme nga jeta praktike, ka bërë që edhe sektorët tjerë arsimor komunal të investojnë në trajnimin e mësimdhënësve. Kështu gjatë vitit 2004/05, falë bashkëpunimit me DKA-të e Prishtinës dhe Istogut, janë përfshirë në trajnim 17 zyrtarë të DKA-ve të Prishtinës dhe Ferizajt dhe 29 mësimdhënës të komunës së Istogut.

Disa shkolla të vetëdijshme për rëndësinë e zbatimit të Programit të MKLSh-së në arritjen e rezultateve më të mira në procesin mësimor dhe për pamundësinë e përfshirjes së shpejtë të mësimdhënësve të tyre në trajnime, kanë filluar organizimin e trajnimeve me participim. Kështu drejtorët e shkollave “Mustafa Bakija 1”, “Emin Duraku” dhe “Zekerija Rexha” në Gjakovë, si dhe “Hasan Prishtina” në Prishtinë, kanë organizuar trajnimet me participim për mësimdhënësit e tyre. Gatishmërinë e mësimdhënësve për të investuar në zhvillimin e tyre profesional, KEC e ka përkrahur me dhurimin falas të udhëzuesve 1-8 për 112 mësimdhënës të këtyre shkollave. Në gjimnazin “S. Frashëri” në Prishtinë për herë të dytë është organizuar trajnimi në baza vullnetare. Kjo ka bërë të mundshëm që të trajnohen të gjithë mësimdhënësit e gjimnazit dhe të lehtësojë zbatimin e teknikave dhe strategjive në të gjitha lëndët.

Duke iu falënderuar partneritetit të KEC-it me donatorë të ndryshëm u bë i mundshëm përfshirja në trajnim e 351 mësimdhënësve të lëndëve dhe niveleve të ndryshme të shkollimit. Kështu 220 mësimdhënës nga 7 qendrat kryesore të Kosovës u trajnuan falë bashkëpunimit me Kultur Kontaktin nga Austria, 100 mësimdhënës të Mitrovicës, Pejës dhe Gjilanit u trajnuan në bashkëpunim me UNICEF-in, ndërsa 31 mësimdhënës të rajonit të Gjakovës u trajnuan në bashkëpunim me OJQ-në Vizioni i Ri nga Gjakova.

Gjatë vitit 2005, Bordet Lokale në 5 qendrat e Kosovës kanë certifikuar 40 mësimdhënës të MKLSh-së (niveli i dytë), duke e rritur numrin e mësimdhënësve të certifikuar deri më tani në 190.

Bordi Qendror i Programit i themeluar vitin e kaluar, këtë vit është funksionalizuar përmes organizimit të trajnimit për trajnerë dhe certifikimit për trajnerë të atyre pjesëmarrësve që kanë plotësuar standardet e programit. Në këtë trajnim për trajnerë kanë marrë pjesë 33 mësimdhënës të certifikuar të MKLSh. Prej tyre 23 janë certifikuar si trajnerë. Me këtë u zgjerua rrjeti i trajnerëve të programit të MKLSh në 41.

KEC në bashkëpunim me Universitetin e Prishtinës dhe atë të Nurembergut në Gjermani ka organizuar trajnime të shkurta lëndore për 200 mësimdhënës të matematikës dhe biologjisë. Trajnimet për matematikë u organizuan në Prishtinë, Mitrovicë, Ferizaj dhe Prizren, ndërsa trajnimet për lëndën e biologjisë u mbajtën në Gjilan, Prishtinë, Mitrovicë dhe Gjakovë.